दर्यापूरात भरधाव बोलेरोचा फटका बसताच म्हशींनी जागीच प्राण सोडला…!

दर्यापूर – महेश बुंदे

शहरातील दर्यापूर अमरावती रोडवर भरधाव वाहनाने ४ म्हशींना जबर धडक दिली. या घटनेत एक म्हैस जागीच ठार तर ३ म्हशी गंभीर जखमी झाल्या आहेत. हि घटना शुक्रवार (दि.१५) रात्री १० वाजता उघडकीस आली आहे. दरम्यान घटनास्थळी नागरिकांनी मोठी गर्दी केली होती.

स्थानिक सैनिक काँलनी येथील रहिवासी पशुमालक रवी तायडे हे रात्रीच्या वेळी म्हशी चारून घरी नेत असताना दर्यापूर अमरावती रोडवर सैनिक कॉलनी चौफुली जवळ मालवाहू बोलेरो क्रमांक एम.पी. १३.जी ए. ७४९५ या भरधाव वाहनाने रस्ता ओलांडत असलेल्या ४ म्हशीना जोरदार धडक दिली. या घटनेत १ म्हैस दगावली असून अन्य गंभीर जखमी असल्याने पशुमालकाचे लाखोचे नुकसान झाले आहे.

घटनेची माहिती दर्यापूर पोलीसांना प्राप्त होताच पोलिस कर्मचाऱ्यांनी घटनास्थळी भेट देत पंचनामा केला. घटनेनंतर चालक पसार झाला होता. पुढील तपास दर्यापूर पोलिस करीत आहेत.