मजीप्राचा पाण्याच्या टाकीवर चढून आंदोलन करण्याचा युवकाचा असफल प्रयत्न ,पोलिसांचा हस्तक्षेप : समज देऊन सोडले

दर्यापूर – महेश बुंदे

गेल्या काही दिवसापासून जीवन प्राधिकरनाचे कामकाज लोकहिताचे नाही असा आरोप करून येवदा येथील नकुल सोनटक्के नामक युवकाने (दि. ०८) सकाळी ११ वाजता दर्यापूरातील दिवाणी न्यायालय परिसरात असलेल्या जीवन प्राधिकरण विभागाच्या पाण्याच्या टाकीवर चढून आंदोलन करण्याचा असफल प्रयत्न केला, विशेष म्हणजे या आंदोलनात या एकट्या युवकाच्या शिवाय कोणीही नागरीक सहभागी झाले नाही, प्रशासनाला कोणतेही पत्र नाही, केवळ फेसबुक वर आंदोलन बाबत पोस्ट केली होती, यासंबंधात जीवन प्राधिकरण विभागाच्या अधिकाऱ्यांनी (दि.०७) दर्यापूर पोलिसांना या संबंधात पत्र दिले होते, दर्यापूर पोलीस या संबंधात अलर्ट होते, सदर युवक पाण्याच्या टाकीवर चढत असताना त्याला दर्यापूर पोलिसांनी ताब्यात घेतले व समज देऊन सोडून दिले.

दर्यापूर जीवन प्राधिकरणाचे माध्यमातून पुरवल्या जाणाऱ्या पिण्याच्या पाण्या संबंधात गेल्या काही दिवसापासून सदर युवक फेसबुक व विविध पोस्ट टाकून लोकांना भडकवत असल्याचे व वातावरण गढूळ करत असल्याचा व यावर कारवाई करावी असे पत्र दर्यापूर जीवन प्राधिकरणाने पोलिसांना दिले होते, त्यानुसार सदर युवक (दि.०८) पाण्याच्या टाकीवर चढत असतानाच दर्यापूर पोलिसांनी त्यास अटक केली व समज देऊन सोडून दिले, सध्या उन्हाळ्याचे दिवस असल्याने पाणीपुरवठा करताना विविध नैसर्गिक अडचणी निर्माण होत आहेत, दर्यापूर जीवन प्राधिकरणाच्या माध्यमातून दर्यापूर तालुक्यात विविध ठिकाणी लिकेजेस दुरुस्त करण्याचे काम युद्धपातळीवर सुरू आहे, कर्मचाऱ्यांची संख्या कमी असल्याने काही कंत्राटी कर्मचाऱ्यांना सुद्धा या कामी लावत दर्यापूर जीवन प्राधिकरण नागरिकांना तातडीने स्वच्छ व नियमित पाणीपुरवठा व्हावा या करता प्रयत्नरत आहे, असे असताना या कामी विनाकारण अडथळा निर्माण करण्याचे काम काही लोक करत असल्याचे व या संबधी पोलिसांना पत्र दिल्याचे जीवन प्राधिकरण अधिकारी अभय देशमुख यांनी सांगितले आहे.