भरदिवसा बँक परिसरातून ७० हजार लंपास ;अज्ञात आरोपीवर गुन्हा दाखल

दर्यापूर – महेश बुंदे

दर्यापूरातील बाभळी येथील रहिवासी उज्वल गंगाकिशन अग्रवाल यांचे स्टेट बँक परिसरातून दिवसाढवळ्या ७० हजाराची रक्कम लंपास झाल्याची घटना (दि. ०४) सोमवारी बारा वाजता उघडकीस आली आहे. या घटनेने नागरिकांमध्ये भितीचे वातावरण निर्माण झाले आहे. घटनेतील फिर्यादी उज्वल अग्रवाल यांनी आपले शेत लागवणने दिले आहे.

संबधित शेतकऱ्यांने लागवणचे दिलेले पैसै अग्रवाल हे सोमवारी स्टेट बँकेत भरण्यासाठी आले होते. दरम्यान बँकेच्या बारकोड मशीनवर गेले असता हातातील ८० हजार रोख असलेली कापडी पिशवी कापून चोरट्याने ५०० व २०० च्या नोटा असलेले दोनही बंडल लंपास केले. पैसै चोरी गेल्याची बाब लक्षात येताच तातडीने पोलीस ठाणे गाठून अग्रवाल यांनी तक्रार दिली. या प्रकरणी अज्ञात आरोपीवर गुन्हा दाखल करण्यात आला आहे. पोलिसांनी बँकेतील सिसिटीव्ही फुटेजची पाहणी केली असून पुढील तपास सुरू आहे.