किल्ले हडसरच्या डोंगरमाथ्यावर वणवा

प्रतिनिधी दत्ता शिंगाडे

जुन्नर वार्ता :- ऐतिहासिक किल्ले हडसरच्या (ता. जुन्नर) डोंगरमाथ्यावर शुक्रवारी (ता. २५) दुपारी लागलेला वणवा सुमारे दहा तासांनी आटोक्यात आणण्यात वनकर्मचारी, वनमजूर व स्थानिक ग्रामस्थांना यश आले. अज्ञात व्यक्तीने लावलेल्या या वणव्यात सुमारे सात हेक्टर वनक्षेत्रातील गवत व छोटी झाडे, झुडपे आगीत जळून नष्ट झाली. वणव्यामध्ये डोंगरावरील गवताचे ५ ते ७ हजारांचे नुकसान झाल्याचा प्राथमिक अंदाज आहे. फायर ब्लोर मशिन व झाडपाल्याच्या साहाय्याने वणवा आटोक्यात आणण्यात आला.

वनपाल मारुती फुलसुंदर, शशिकांत मडके, वनरक्षक संजय गायकवाड यांनी फायर टीम व गावातील स्थानिक ग्रामस्थ, पेठेवाडीतील नाना भले, बाळू मुंढे, सुनील साबळे, मोतीराम भले, गणेश मोधे, विक्रम मुंढे, लहू पारधी, रोहिदास मुंढे, विश्वास साबळे, अप्पा भले, मोतीराम भले आदींच्या मदतीने रात्री दहा वाजेपर्यंत वणवा आटोक्यात आणण्याचे काम झाले.