आंतरराष्ट्रीय ॲथलेटिक्स स्पर्धेत भारतीय महाविद्यालयाला सुवर्ण पदक

अमरावती – महेश बुंदे

इंडियन पॅसिफिक स्पोर्ट्स द्वारा आयोजित पाचवी आंतरराष्ट्रीय इंडो नेपाल स्पर्धा दिनांक २८ ते ३१ जानेवारी २०२२ दरम्यान नेपाळ येथे आयोजित करण्यात आली होती या आंतरराष्ट्रीय स्पर्धेत भारतीय महाविद्यालय अमरावतीचा बी. कॉम. भाग १ चा विद्यार्थी कलश प्रकाशराव खंडारे याने १९ वर्षा खालील वयोगटातील ॲथलेटिक्स क्रीडा प्रकारातील भालाफेक या क्रीडा स्पर्धेमध्ये सुवर्ण पदक प्राप्त केले आहे.

या आंतरराष्ट्रीय ॲथलेटिक्स क्रीडा स्पर्धेत जगातील विविध देशातून बहुसंख्य खेळाडू सहभागी झाले होते त्यामधून भारतीय महाविद्यालय अमरावतीचा विद्यार्थी कलश प्रकाशराव खंडारे याने सुवर्णपदक प्राप्त करून महाविद्यालयाच्या लौकिकात भर टाकली आहे. त्याच्या या यशाचे सर्वत्र कौतुक होत आहे. या स्पर्धेकरिता त्याला प्रशिक्षक म्हणून अभिजीत बि. एल. सर तसेच महाविद्यालयाच्या शारीरिक शिक्षण विभागाच्या विभाग प्रमुख डॉ. संगीता देशमुख व क्रीडा संचालक डॉ. विक्रांत वानखडे यांचे मार्गदर्शन लाभले, त्याच्या या यशाचे सर्वत्र अभिनंदन होत असून महाविद्यालयाच्या प्राचार्या डॉ. आराधना वैद्य, सर्व महाविद्यायातील प्राध्यापक, शिक्षक व शिक्षकेतर कर्मचारी यांनी त्याचे अभिनंदन केले आहे.