थिलोरी येथील अवैध दारू विक्रेत्याची पोलिसांना मारहाण

दर्यापूर – महेश बुंदे

दर्यापूर तालुक्यातील थिलोरी येथे अनेक दिवसांपासून अवैध दारू विक्री सुरु आहे. दिनांक २३ जानेवारी रोजी थिलोरी येथील रहिवासी सुनील वाकपांजर याच्या राहत्या घरी अवैध दारूसाठा व दारू विक्री सुरू असल्याची गुप्त माहिती दर्यापूर पोलीस विभागाला मिळताच दर्यापूर पोलीस स्टेशनचे कर्मचारी यांनी अवैध दारू विक्री करणारा सुनील वाकपांजर याच्या राहत्या घरी धाड टाकून दारूच्या पावट्या जप्त केल्या व उर्वरीत दारूसाठा कुठे लपवला असे पोलिसांनी विचारपूस करताच पोलीस व दारू विक्रेते यांच्यामध्ये बाचाबाची झाली.

बाचाबाचीचे रुपांतर वादात होत आरोपी सुनील वाकपांजर, अनिल वाकपांजर, अमोल वानखडे, रंजना वाकपांजर यांनी पोलिसांवर हल्ला चढवला. आरोपी मधील अमोल वानखडे यांनी दर्यापूर पोलीस स्टेशनचे सहाय्यक पोलीस निरीक्षक किरण औटे यांच्यावर व कर्मचारी रितेश देशमुख यांच्यावर दारूच्या बॉटल फेकून गंभीर जखमी केले. या दोघांना अमरावती येथील खाजगी दवाखान्यात उपचारासाठी भरती करण्यात आले आहे.

मुख्य आरोपी सह सर्व आरोपी पसार झाले असून त्याचा शोध दर्यापूर पोलीस करत आहे. आरोपीवर आयपीसी कलम 353, 307, 332, 333, 336, 186, 504/34 सह कलम 65 द्वारा गुन्हा दाखल करण्यात आला आहे. पुढील तपास ठाणेदार प्रमेश आत्राम यांच्या मार्गदर्शनाखाली सुरू आहे.