घरकुल योजनेकरिता अपात्र ठरलेले तीन कुटुंब करणार प्रजासत्ताक दिनी आत्मदहन

तोंगलाबाद येथील ‘त्या’ अन्यायग्रस्त कुटूंबाने दिले गटविकास अधिकारी यांना निवेदन, घरकुलाची ‘ड’ यादी प्रकाशित होताच दिले होते निवेदन, प्रशासनाने केले दुर्लक्ष

दर्यापूर – महेश बुंदे

दर्यापूर पंचायत समिती अंतर्गत येणाऱ्या अनेक गावांत मागील पाच महिने आधी राज्य व केंद्र शासन पुरस्कृत घरकुल योजनेच्या लाभार्थ्यांची ‘ड’ यादी प्रकाशित करण्यात आली होती. यामध्ये तालुक्यातील तालुक्यातील तोंगलाबाद येथील अनेक गरजू लाभार्थी या घरकुल योजनेसाठी अपात्र ठरले होते.

या करिता ग्रामपंचायत सरपंच वैशाली निरंजन पानझाडे व सदस्या ममता संतोष ठाकरे याच्या नेतृत्वाखाली गावकऱ्यांनी दर्यापूर पंचायत समिती गटविकास अधिकारी यांना मागणीचे निवेदन दिले होते. पण पाच महिने झाले तरी अजूनपर्यंत सुधारित घरकुल लाभार्थी यांची यादी प्रकाशित करण्यात आली नाही. त्यामुळे तोंगलाबाद येथील घरकुल योजनेपासून वंचित असणारे लाभार्थी ग्रामपंचायत सदस्या अन्नपूर्णा हरिदास काळदाते, कांताबाई संतोष बीजवाडे, लक्ष्मीबाई सहदेवराव चव्हाण या तीन कुटुंबानी दि २६ जानेवारी २०२२ “प्रजासत्ताक दिनी” ग्रामपंचायत समोर आत्मदहन करणार असल्याचा इशारा निवेदनाच्या द्वारे प्रशासनाला दिला आहे.

या गरजू तीन कुटूंबाची व गावातील अशा अनेक नागरिकाची नावे अपात्र यादीत टाकण्यात आले आहे, याचे कारण म्हणून त्याची पक्के घरे आहेत, त्याच्याकडे मोबाईल, दोनचाकी वाहने आहेत, असे देण्यात आले. पण वास्तविक परिस्थिती पाहता या अपात्र यादीत असणाऱ्या नागरिकांकडे अशा प्रकारे भौतिक वस्तू नाही तरी सुद्धा त्याचे अपात्र यादीत नावे आहेत, याला दोषी त्यावेळी सर्वे करणारे शासनाचे कर्मचारी आहेत, त्यामुळे या सामान्य गरजू नागरिकांवर अन्याय झाला आहे.

तरी आमची नावे घरकुल योजनेच्या पात्र यादीत समाविष्ट करावे व लवकरात लवकर सुधारित घरकुल यादी प्रकाशित करून आम्हाला घरकुल योजनेचा लाभ द्यावा, या मागणीसाठी सदर कुटूंबाने आत्मदहन करण्याचा इशारा दिला आहे. या निवेदनात या कुटूंबाने म्हटले आहे की, दि २६ जानेवारी “प्रजासत्ताक दिनी” आम्ही कुटूंबासह आमरण उपोषण करणार आहोत, तरी आमच्या जीवाचे बरे वाईट झाले तर याला शासन जबाबदार राहणार असून या निवेदनाची प्रतिलिपी ग्रामपंचायत सचिव, मा.तहसीलदार दर्यापूर, मा.ठाणेदार दर्यापूर पोलीस स्टेशन, मा.आमदार दर्यापूर विधानसभा, मा.उपजिल्हाधिकारी अमरावती, मा.जिल्हाधिकारी, अमरावती यांना देण्यात आली आहे.