वाशिम:-मदत तुमची छोटी मोठी हास्य येईल कुणाच्या तरी ओठी हे ब्रीदवाक्य घेऊन कारंजा मानोरा परिसरात एक ऊब जाणिवेची ही संस्था गेली तीन वर्षांपासून समाजातील वंचित घटकांसाठी वेगवेगळे उपक्रम राबवित आहे. ज्यांना कोणी आधार नाही मनोरुग्ण दिव्यांग अशा व्यक्तींना किराणा किट देण्याचे काम गेल्या काही वर्षांपासून एक ऊब जाणिवेची सातत्याने करीत आहे. एक ऊब जाणिवेची या संस्थेने काही कुटुंबही दत्तक घेऊन त्यांना दर महिन्यांला किराणा पोहचवण्याचे काम प्रत्यक्ष त्यांच्या घरी जाऊन केल्या जाते.
या संस्थेमधील जे सदस्य आहेत ते आपले, स्वत:चे, मुलांचे, मुलींचे पत्नीचे वाढदिवस व आनंदाचे क्षण साजरे करताना एक विशिष्ट रक्कम एक ऊब जाणिवेला सातत्याने देत असतात कुणी आपल्या आई वडिल व नातेवाईकांच्या मृत्यूचे दु:ख बाजूला ठेवून तेरवीवर होणारा खर्चही एक ऊब जाणिवेला देतात.
देणगीदारांमध्ये व्यापारी, शेतकरी, इंजिनीयर, पोलिस, पटवारी, शिक्षक, कारागीर, मजूर व सर्वसामान्य नागरिक आहेत. महाराष्ट्रातील अनेक जिह्यांमधून देणगीदार आपल्या देणग्या पाठवीत आहेत यामध्ये पालघर जिल्हा सातत्याने मदत करत असतो. शिवाय अमेरिका, इंग्लंड, जर्मनी, लंडन, साऊथ आफ्रिका यासारख्या देशातूनही मदतीचा ओघ वाढत आहे. अनेक देणगीदार हे पैसे आणि धान्य या रुपात आपली मदत करीत आहे . वाशीम जिल्ह्यासोबतच आता यवतमाळ जिल्ह्यातही आपले मदत पोहचवण्याचे काम एक ऊब जाणिवेची करत आहे.
नुकतेचं मिशन दिवाळी या उपक्रमांतर्गत मानोरा कारंजा व मंगरूळपीर परिसरातील तब्बल 125 कुटुंबांना किराणा कीट कपडे मिठाईचे वाटप करण्यात आले आहे. या मिशन दिवाळी मुळे अनेक कुटुंबांची दिवाळी ही तेजोमय व आनंदी झाल्याचे चित्र दिसत आहे.
