दर्यापूर – अंजनगाव बस सेवा सुरू

दर्यापूर – महेश बुंदे

महाराष्ट्र राज्य परिवहन महामंडळाच्या कर्मचाऱ्यांचे विविध मागण्यांसाठी गत दोन महिन्यापासून कामबंद आंदोलन सुरू आहे. यामुळे राज्यभरातील बस सेवा ठप्प झालेली आहे. या कारणाने प्रवासी तसेच विद्यार्थ्यांचे हाल होत आहेत परंतु मागण्या मान्य झाल्याशिवाय आंदोलन मागे घेणार नाही असा ठाम पवित्रा एसटी महामंडळाच्या अनेक कर्मचाऱ्यानी घेतला आहे.

परंतु एसटी कर्मचाऱ्यात फूट पडल्यामुळे काही कर्मचारी कामावर रुजू झाले आहेत. दर्यापूर आगारातून अंजनगावकडे एक बस सुरू करण्यात आली आहे. दर्यापूर ते अंजनगाव या महामार्गावर एक बस धावत असून या बसला बऱ्यापैकी प्रतिसाद मिळत आहे. दर्यापूर शहरातील नागरिकांना गत दोन महिन्यांपासून एसटीचे दर्शन झाले नव्हते परंतु २८ जानेवारी पासून एक दर्यापूर अंजनगाव बस धावू लागली आहे. दोन महिन्यानंतर प्रथमच दर्यापूरमध्ये बस आल्यामुळे अनेकांनी आपल्या मोबाईलमध्ये या बसचे छायाचित्र टिपले आहे. जोपर्यंत संप मिटणार नाही तोपर्यंत प्रवाशांचे हाल सुरू राहणार आहेत. शासनाने कर्मचाऱ्यांसोबत बोलणे करून तोडगा काढावा अशी मागणी सामान्यांकडून केली जात आहे.