दर्यापूरात छत्रपती शिवरायांचा पुतळा हटवला

दर्यापूर – महेश बुंदे

दर्यापूर येथील मुख्य पेट्रोल पंप चौकात (दि. १६) रविवारच्या रात्री शिवसेनेने शिवाजी महाराज यांचा पुतळा बसवला होता. बसविलेला छत्रपती शिवाजी महाराज यांचा पुतळा अनधिकृत असल्यानं (दि. १७ ) मध्यरात्री दोन वाजताच्या सुमारास शिवाजी महाराजांचा पुतळा हटवण्यात आला आहे.

दर्यापूर पोलीस आणि नगरपालिका प्रशासनानं ही कारवाई केली आहे. विनापरवानगी बसविलेला पुतळा हटविल्याने दर्यापूर शहरात सकाळपासून तणावाचे वातावरण समाज माध्यमावर उमटत आहे. या ठिकाणी पोलिसांचा मोठा बंदोबस्त दर्यापूर शहरात तैनात करण्यात आलेला आहे. शांतता व सुव्यवस्थेचा प्रश्न कुठेही निर्माण होऊ नये या परिस्थितीवर पोलीस लक्ष देऊन आहेत. शिवाजी महाराजांचा पुतळा रातोरात हटवण्यात आल्यानंतर शिवप्रेमींकडून संतापाची लाट उसळली जात आहे.