कोरोनाच्या काळात शिक्षणाच्या आईचा घो…विद्यार्थ्यांच्या मुळावर सततचे निर्बंध

दर्यापूर – महेश बुंदे

सततचे निर्बंध विद्यार्थ्यांच्या मुळावर आले असून कोरोना संकटात शिक्षणाच्या आईचा घो… म्हणण्याची वेळी पालक व विदयार्थ्यांवर आली आहे. गेल्या दोन वर्षापासून कोरोनाच्या संघटकाळामुळे शिक्षण व्यवस्था खिळखिळी झाली असून ऑफलाईन ऑनलाईनच्या काळात विद्यार्थी पुरता भरडला जात आहे. अनेक ग्रामीण भागातील अनेक विद्यार्थी शहरात शिक्षणासाठी वास्तव्यास आहे.

शैक्षणिक फी, ट्युशन फीसह मेस व घरभाडे दिल्यानंतर या शाळा सुरू बंद हे सुरू असल्याने सर्वसामान्य पालकांना नाहक आर्थिक भुर्दंड सोसावा लागत आहे. त्यामुळे शैक्षणिक व आर्थिक नुकसान होत असल्याने पालकात चिंतेचे वातावरण आहे. दरम्यान कोरोनाच्या प्रादुर्भावाने प्रशासनाकडून शिक्षणावर वेळोवेळी निर्बंध लावण्यात आले आहेत. या काळात आजची शिक्षणपद्धती प्रचंड चुरशीची आणि स्पर्धात्मक झाली आहे.

त्यात शेतीमालाची अनिश्चितता, वाढलेली महागाईमुळे पालकांना जगण्यासाठी संघर्ष करताना मुलांचा भविष्य बनवण्यासाठी पालक जिवाचं रान करीत आहे. मात्र या कोरोनारुपी संकटकाळाने शाळा चालू तर कधी बंद होत असल्याने विद्यार्थ्यांच्या शिक्षणावर विपरीत परिणाम होत असून ऑफलाइन व ऑनलाइनच्या घोळात पालक व विद्यार्थी पिटले जात आहेत.