शासकीय वसतिगृहात संविधान दिन उत्साहात साजरा

दर्यापूर – महेश बुंदे

विविध धर्म, संप्रदाय, भाषा, चालिरीती असतानाही, सर्वांमध्ये एकात्मता उत्पन्न करणारे असे देशाचे संविधान आहे. या संविधानाने आपल्या देशात अद्वितीयरितीने लोकशाही शासन दृढमूल केले आहे. म्हणून त्यांचे आपल्या जीवनात महत्व आहे. भारतरत्न डॉ. बाबासाहेब आंबेडकर यांच्या उत्तुंग प्रतिभेची ते साक्ष आहे, असे प्रतिपादन
दर्यापूर येथील डॉ. बाबासाहेब आंबेडकर मागासवर्गीय मुलांचे वसतिगृहाचे अधीक्षक श्री. अनिल खेडकर यांनी संविधान दिनी ( २६ नोव्हेंबर २०२१ ) कार्यालयात शुक्रवारी आयोजित केलेल्या ‘भारतीय संविधान दिवस’ समारोहात काढले.

भारतरत्न डॉ. बाबासाहेब आंबेडकर यांना पुष्पहार अर्पण करून सुरु झालेल्या या समारंभात सुरवातीला सर्व उपस्थितांनी संविधानाची उद्देशिका सामुदायिक म्हटली. संविधानाच्या प्रास्ताविकेचे वाचन व कार्यक्रमाचे सूत्रसंचालन माजी विद्यार्थी महेश बुंदे यांनी केले तर आभार कर्मचारी विकास भोंगाडे यांनी मानले. यावेळी सर्वांना संविधान दिनाच्या शुभेच्छा दिल्या. कार्यक्रमाला माजी विद्यार्थी महेश बुंदे, दिलीप राठोड, धर्मेंद्र आठवले, विकास भोंगाडे, तुषार पचगाडे, शेखर शिरभाते यांच्यासह प्रवेश घेणारे दोन विद्यार्थी आवर्जून उपस्थित होते.