दर्यापूर बस स्थानक दहा दिवसांपासून बसविना

दर्यापूर – महेश बुंदे.:-

गत १० दिवसांपासून विविध मागण्यांसाठी संपूर्ण महारास्ट्रामध्ये एसटी महामंडळाच्या कर्मचाऱ्यांचा संप सुरू आहे. या संपामुळे सर्वसामान्य प्रवाशांचे हाल होत आहेत. या एसटी बंदचा फटका खाजगी व्यावसायिकांनाही बसत आहे. गत दहा दिवसांपासून एसटी महामंडळाच्या कर्मचाऱ्यांचा संप सुरू असल्यामुळे दर्यापूर बसस्थानकात एकही बस फिरकली नाही. यामुळे दहा दिवसापासून दर्यापूर बस स्थानक रिकामेच आहे. एसटी कर्मचाऱ्यांना सातवा वेतन आयोग लागू करावा, एसटी महामंडळ शासनामध्ये विलीन करून घ्यावे, कर्मचाऱ्यांना अन्य शासकीय कर्मचाऱ्यांप्रमाणे लाभ द्यावा, या व अन्य मागण्यांसाठी कर्मचाऱ्यांचा गत १० दिवसांपासून संप सुरू आहे. दिवसेंदिवस हा संप चिघळत आहे.

या संपामुळे सर्वसामान्य नागरिकांचे तसेच प्रवाशांचे नियोजनही कोलमडून पडले आहेत. दुसऱ्या गावाला जाण्यासाठी खाजगी वाहनांचा आधार घ्यावा लागत आहे. एसटीला गोरगरीब तसेच मध्यमवर्गीयांची जीवनवाहिनी म्हणून समजली जाते परंतु लालपरीची चाके जागच्याजागी थांबल्यामुळे सामान्य तसेच सर्वसामान्यांना प्रवास करताना अडचणी निर्माण होत आहे. ६० वर्षावरील नागरिकांसाठी बसमध्ये अर्धे तिकीट असते परंतु आता अशा नागरिकांना खासगी वाहनाने जादा पैसे देऊन प्रवास करावा लागत आहे. तसेच शाळकरी विद्यार्थ्यांना देखील याचा फटका बसत आहे. दर्यापूर बसस्थानकामध्ये दररोज ४० ते ४५ बसेस येत असतात परंतु जेव्हापासून संप सुरू झाला त्या दिवसापासून बस येणे बंद झाले आहे. यामुळे दर्यापूर बसस्थानकाकडे कोणी फिरकत नाही, दर्यापूर बसस्थानक गत काही दिवसापासून रिकामेच दिसत आहे.