आज महिला किसान दिनानिमित्त विविध कार्यक्रमाचे आयोजन

प्रतिनिधी फुलचंद भगत :-

वाशिम : 22 ऑक्टोबर रोजी महिला किसान दिनाचे औचित्य साधून कृषी विभागाच्यावतीने विविध कार्यक्रमाचे आयोजन करण्यात आले आहे. पोक्रा प्रकल्पातील गावांमध्ये सकाळी 8 वाजता शेती शाळेचे आयोजन करण्यात आले आहे. या शेती शाळेमध्ये जास्तीत जास्त महिलांना हवामान अनुकुन तंत्रज्ञानाची माहिती देण्यात येणार आहे. सकाळी 10 वाजता पोक्रा प्रकल्पाअंतर्गत उभारण्यात आलेल्या मंगरुळपीर तालुक्यातील चांभई येथील शेतीनिष्ट शेतकरी पुरस्कार प्राप्त श्री. दिलीप फुके यांच्या माऊली शेतकरी उत्पादक कंपनीच्या निंबोळी तेल प्रकल्पास व सीड प्रोसेसिंग युनिटला भेट देण्यात येणार आहे. सकाळी 11 वाजता सर्व तालुक्यात तालुकास्तरावर महिला किसान दिनाच्या कार्यक्रमात कृषी ताई व ग्राम कृषी संजिवनी समितीमधील महिला आणि महिला बचतगटातील महिला उपस्थित राहणार आहे. या कार्यक्रमात कृषी मुल्यवर्धन आणि विपणन साखळी व्यवस्थापन या विषयात उत्कृष्ट काम करणाऱ्या महिलांचा सत्कार करण्यात येणार आहे. कृषी विभागाच्या विविध योजनांची माहिती तसेच पोक्रा प्रकल्पातील विविध योजनांची माहिती देण्यात येणार आहे.

दुपारी 2 वाजता जिल्हा अधिक्षक कृषी अधिकारी श्री. तोटावार यांच्या अध्यक्षतेखाली कृषी मुल्यवर्धन आणि विपणन साखळी या विषयावर कृषी विज्ञान केंद्र करडा येथे गृह विज्ञान विभागाच्या शुभांगी वाटाणे यांच्या मार्गदर्शनात जिल्हास्तरावर महिला शेतकरी व इतर शेतकऱ्यांसाठी कार्यशाळेचे आयोजन करण्यात आले आहे. या कार्यशाळेत कृषी उपसंचालक निलेश ठोंबरे व विभागीय कृषी अधिकारी डि.के. चौधरी हे देखील मार्गदर्शन करणार आहे. तसेच पोक्रा प्रकल्पाची तोंडओळख या विषयावर आणि पोक्रा प्रकल्पातील विविध योजनांची सविस्तर माहिती प्रकल्प कृषी विशेषज्ञ एम.जे. अरगळे हे देणार आहे. तरी जिल्हयातील जास्तीत जास्त शेतकरी महिलांनी या कार्यक्रमात सहभागी व्हावे. असे आवाहन कृषी विभागाने केले आहे.