पिंपरी चिंचवड मध्ये अघोरी प्रकार ; मृत्यूची भीती दाखवून 7 लाखाला गंडा

पुणे वार्ता :- पिंपरी चिंचवड परिसरात जादूटोणा केल्याच्या कारणातून एका व्यक्तीला 7 लाखांना गंडा घातल्याचा धक्कादायक प्रकार उघडकीस आला आहे. आरोपी मांत्रिक महिलेनं फिर्यादी व्यक्तीला मृत्यूची भीती दाखवून वेळोवेळी विविध कारणं देत तब्बल 7 लाखाची फसवणूक केली आहे.याप्रकरणी पिंपरी चिंचवड पोलीस ठाण्यात फिर्याद दाखल करण्यात आली आहे. किमदेवांशी सोलंकी असे गुन्हा दाखल झालेल्या आरोपी ज्योतिष महिलेचं नाव आहे.

याबाबत माहिती अशी की, आरोपी किमदेवांशी सोलंकी चिंचवड येथील उद्योगनगर परिसरातील श्रद्धा रेसीडेन्सी इमारतीतील रहिवासी आहे. याप्रकरणी प्रशांत बबनराव टेके यांनी फिर्याद दिली. आरोपी महिलेने फिर्यादीला आणि फिर्यादीच्या कुटुंबीयांना होणारा मानसिक त्रास कमी करण्याच्या नावाखाली त्यांची आर्थिक फसवणूक केली आहे. मुसलमान, पीर, फकीर, बाबा किंवा तृतीयपंथी यांच्यापैकी कोणीतरी तुमच्यावर करणी केलीय. त्यांचा प्रभाव तुमच्या कुटुंबीयांवर मोठ्या प्रमाणावर झालाय. हे दूर करण्यासाठी गुप्त आणि आघोरी पूजा करावी लागेल. अशी पूजा केली नाही तर तुमचा मृत्यूही अटळ आहे. अशी भीती घालून आरोपी महिलेनं वेळोवेळी फिर्यादीकडून 7 लाख 21 हजार 491 रुपये रोख ऑनलाइन पद्धतीने घेतले आहे.

दरम्यान, आपली फसवणूक होत असल्याचे समजताच फिर्यादी प्रशांत टेके यांनी पिंपरी चिंचवड पोलीस ठाण्यात फिर्याद दिली. यानंतर पोलिसांनी महाराष्ट्र नरबळी आणि इतर अमानुष, अनिष्ट, आघोरी प्रथा व जादूटोणा यांना प्रतिबंध घालण्याबाबत व त्याचं समूळ उच्चाटन करण्याबाबत अधिनियम 2013 च्या कलम 3 नुसार गुन्हा (FIR) दाखल केला आहे. याबाबत अधिक तपास पोलिस करीत आहेत.