अमरावती मध्ये विद्युत वाहिनीच्या स्पर्शाने चार जणांचा मृत्यू

अमरावती : लोखंडी शिडीला ११ केव्हीच्या तारांचा स्पर्श होऊन झालेल्या अपघातात चौघांचा ऑन द स्पॉट मृत्यू झाला.

कठोरा रोडस्थित पी. आर. पोटे ग्रुप ऑफ एज्युकेशनल इन्स्टियुटसमोर बुधवारी दुपारी १२ च्या सुमारास ही हृद्यद्रावक घटना घडली. नांदगाव पेठ पोलिसांनी घटनास्थळ गाठून पंचनामा केला. या घटनेने शहरात एकच खळबळ उडाली आहे.

अक्षय साहेबराव सावरकर (२६, रा. टाकळी जहांगिर), प्रशांत अरूण शेलोरकर (३१, शिराळा), संजय बबनराव दंडवाईक (४५, आदिवासी नगर, अमरावती) व गोकुल शालिकराम वाघ (२९, रा. टाकळी जहांगिर) अशी मृतांची नावे आहेत. चौघेही पी. आर. पोटे ग्रुप ऑफ एज्युकेशनल इन्स्टियुटमध्ये कंत्राटी शिपाई होते, अशी नोंद नांदगाव पेठ पोलिसांनी घेतली आहे.

नांदगाव पेठ पोलिसांनी तत्काळ घटनास्थळ गाठून चौघांनाही जिल्हा सामान्य रुग्णालयात हलविले. वैद्यकीय अधिकार्यांनी तपासून चौघांनाही मृत घोषित केले.

रंगकाम पूर्ण झाल्यामुळे शिडी दुसऱ्या ठिकाणी हलविण्याच्या सूचना येथील चार कर्मचाऱ्यांना केली होती. इन्स्टिट्यूटच्या देखभाल व दुरुस्ती विभागातील हे कर्मचारी २५ फूट लांब शिडी बाजूला करण्यासाठी आले. शिडी सरकवित असताना वरून जाणाऱ्या ११ केवीच्या जिवंत विद्युत वाहिनीकडे त्यांचे लक्ष नव्हते. लोखंडी शिडीचा जिवंत विद्युत वाहिनीला स्पर्श झाला आणि त्याच वेळी विजेचा जोरदार धक्का बसल्याने चार कर्मचारी मृत्यू झाला असल्याची प्राथमिक माहिती मिळाली.

आज पी.आर. पोटे पाटील अभियांत्रिकी महाविद्यालयातील चार शिपायांचा वीज तारांच्या स्पर्शाने मृत्यू झाल्याच्या घटनेने शहरात मोठी खळबळ उडाली आहे.